Drøymer du om å utforske kunsten din, få tid og rom til å vere kreativ – og finne ut kva du eigentleg vil uttrykkje? Då er Kunst & Natur-linja for deg. På Kunst & Natur handlar det ikkje om å vere «flink» på tradisjonell måte. Det handlar om å tore, teste, feile, leike, tenkje nytt – og slik finne ditt eige kunstnarlege uttrykk.

Du blir ein del av eit kreativt fellesskap saman med andre som brenn for å skape. På linja inspirerer vi kvarandre, deler idear, byggjer kvarandre opp – og lagar eit miljø der du verkeleg får blomstre. Du får arbeide praktisk med prosjekta dine, prøve mange ulike teknikkar og materiale – og verkeleg kjenne på skapargleda. Her er det heilt lov å tenkje stort, gå eigne vegar og gjere ting på din måte.

Gjennom året lagar vi eigne utstillingar – både på skulen og ute i lokalmiljøet. Vi dreg på turar og vitjar utstillingar, galleri og museum, både i Noreg og utlandet. I tillegg får du tid og rettleiing til å utvikle din eigen portefølje.

Skulen ligg fantastisk til, midt i vill og vakker vestlandsnatur – hit har kunstnarar kome i lang tid, nettopp for å skape. Vi hentar òg mykje inspirasjon ute i naturen. Vi tek med skisseboka på tur, finn roa langt frå skjerm og støy – og brukar naturen både som pusterom og drivstoff til nye idear.